सहकारी छानबिनबारे गगन थापाले माफी मागेका हुन्? यस्तो छ वास्तविकता

गगन थापाको भाइरल भिडिओको क्लिप यति सुझबुझले निकालिएको छ कि, वरपरको दृश्य नै फालेर अनुहार मात्रै क्रप गरेर जुम गरेर देखाइएको छ।

भिडिओको फ्रेम निकालेर मात्रै नतिजा निकाल्न नसकिने देखेर हामीले भाइरल भिडियोमा देखिएको गगन थापाको निधारमा लगाइएको टीका र कपालमा अड्किएको फूलको टुक्रालाई अलि राम्रोसँग नियालेर रवि लामिछानेबारे गगन थापाले बोलेका सार्वजनिक भिडियो खोज्न थाल्यौं।

यस क्रममा सन् २०२४ को मे १० मा सूत्र टिभीको आधिकारिक फेसबुक पेजमा पोस्ट भएको गगन थापाको १४ मिनेट २३ सेकेन्डको भिडियो भेटियो। सूत्र टिभीको भिडियोमा देखिएका गगन थापा र भाइरल भिडिओमा देखिएका गगन थापाको निधारमा रहेको टीका र कपालमा अड्किएको फूल समान भेट्टायौँ। यो भिडियोको ११ मिनेट ५३ सेकेन्डमा यही भाइरल भिडियो क्लिपमा जस्तै भेटियो।

वास्तवमा यो भिडियो सहकारी प्रकरणबारे छानबिन समिति बन्नुभन्दा अघिको हो। भिडियोमा रवि लामिछानेबारे कांग्रेस महामन्त्री गगन थापाले कतै पनि माफी मागेका छैनन्। बरु उनले छानबिन समिति बन्नुपर्ने, यदि छानबिन समितिले केही पनि भेटेन भने सिंगो कांग्रेस र आफ्नो पनि प्रतिष्ठाको विषय हुने भएकोले चुनाैती मोलेर नै छानबिन समितिको माग गरिएको दाबी गरेका छन्। त्यतिबेला संसदमा सहकारी प्रकरणमा छानबिन समिति बनाउन पर्ने कि नपर्ने भन्ने विषयमा निकै ठूलो सवाल जवाफ चलिरहेको थियो।

दावी:  सहकारी प्रकरणमा रवि लामिछानेबारे आफूहरुले उठाएको सबै कुरा गलत भएको भनेर गगन थापाले माफी मागेको ।

दावीकर्ता : जनधारणा खबर युटुब च्यानलमार्फत निमकान्त पाण्डे, प्राइम खबर अनलाएन नामक फेसबुक पेज  र लक्ष्मी ज्ञवाली नामक फेसबुक प्रोफाइल ।

तथ्य: भ्रामक । सहकारी प्रकरणमा संसदीय छानबिन समिति बनेको तर रवि लामिछानेबारे केही पनि नभेटिएको र आफूहरुले उठाएको विषय सबै गलत सावित भएको भनेर नेपाली का‌ंग्रेसका महामन्त्री गगन थापाले कतै पनि बोलेका छैनन्। संसदीय छानबिन समिति बन्नुअघि गगन थापाले सन् २०२४ को मे १० मा पत्रकारसँग गरेको कुराकानीलाई तोडमोड गरेर भिडिओ भाइरल गराइएको हो।